काठमाण्डौ: युनिभर्सिटि अफ क्यामब्रिज इन्टरनेशनल इक्जामिनेशनमा काठमाण्डौ एकेडेमीका इंग्रोज श्रेष्ठ विश्व उत्कृष्ट भइका छन् । क्याम्ब्रिज इन्टरनेशनल ए-लेभल जुन २०१० को सेसनको परिक्षामा उनी गणित विषय मा विश्वमै उत्कृष्ट भएका हुन् ।

त्यसैगरी एएस लेभलमा जुन सेसनमा रातो बंगला स्कुलका व्यजना थापा र नोभेम्बर सेसनमा सोही स्कुलकै स्थितोस्ना नेपाल विश्व उत्कृष्ट भइका छन् । थापालाई अंग्रेजी भाषा साहित्य र जनरल पेपलर (इन्टरनेशनल) मा विश्वउत्कृष्ट स्थान प्राप्त भएको हो ।

ब्रिटिश काउन्सिल र युनिभर्सिटी अफ क्याम्ब्रिज इन्टरनेशनल एक्जामिनेशनद्वारा बिहीबार राजधानीमा आयोजना गरिएको कार्यक्रममा सन् २०१० को विभिन्न सेसनमा विश्वउत्कृष्ट तथा नेपाल उत्कृष्टलाई "आउटस्टान्डिङ लर्नर अवार्डस् इन नेपाल २०११" वितरण गरिएको छ । उपराष्ट्रपति परमानन्द झाले अवार्ड वितरण गर्नुभएको थियो ।

पुरस्कार वितरण कार्यक्रममा बोल्दै उपराष्ट्रपति झाले विश्वप्रतिष्ठित एलेभलमा नेपाली विद्यार्थीहरु उत्कृष्ट हुनु खुसिको कुरा भएको उल्लेख गर्नुभयो । अहिले नेपालमा विश्वसँग प्रतिस्पर्धा गर्न सक्ने खालको शिक्षा आवश्यक रहेको उहाँको धारणा थियो । उपराष्ट्रपति झाले ए लेभल शिक्षा नेपालमा पनि फस्टाउँदै गएको र यो शिक्षा पाएका विद्यार्थी विश्व प्रतिस्पर्धा गर्न सक्ने व्यक्त गर्नुभयो ।

कार्यक्रममा उत्कृष्ट विद्यार्थीहरुलाई प्रमाणपत्र प्रदान गर्दै ब्रिटिश काउन्सिलका कन्ट्री डाइरेक्टर डा. रोवर्ट मोन्‍रोले नेपालमा एलेभल अध्ययन गर्ने विद्यार्थीको संख्या बढ्दै गएको बताउनु भयो । सो कार्यक्रममा ब्रिटिश काउन्सिलका क्षेत्रीय प्रतिनिधि एन्डिउ सर्टवेल, बुढानिलकण्ठका प्रिन्सिपल नाराय ण प्रसाद शर्माले ए लेभलको महत्वबारे प्रकाश पार्नु भएको थियो ।

नेपालमा ए लेभल पढाउने विद्यालयको संस्था क्याम्ब्रिज एजुकेटर्स एसोसियसन (सिइन) नेपालका अध्यक्ष सुधिर झाले नेपाली विद्यार्थीले विश्वस्तरीय शिक्षा पाएको र विश्वस्तरमा प्रतिस्पर्धी भएको बताउनुभयो ।

गोरखापत्र समाचारदाता: काठमाण्डौ, चैत्र १७ गते । उपराष्ट्रपति परमानन्द झाले सन २०१० मा नेपालबाट एलेभलको परीक्षामा विभिन्न स्थान हासिल गर्ने विद्यार्थीलाई बिहीबार यहाँ पुरस्कृत गर्नुभएको छ ।

क्याम्ब्रिज विश्वविद्यालयको जनरल सर्टिफिकेट अफ एजुकेशन (जिसिई) कार्यक्रम अन्तर्गत सञ्चालित शैक्षिक कार्यक्रम ए लेभलमा विश्वमै उत्कृष्टता हासिल गर्ने तीन जनाका साथमा विभिन्न विषयहरुमा नेपालमा उत्कृष्ट हुने दर्जनौं विद्यार्थीहरुलाई सम्मान गर्नु भएको हो ।

विद्यार्थीहरुलाई सम्मान गर्दै उपराष्ट्रपति झाले विश्वव्यापीकरणसँगै नेपालमा पनि ए लेभलको महत्व बढ्दै गएको बताउनुभयो ।

शिक्षा प्रणालीमा विश्वमै नेपाली विद्यार्थी पनि कम छैन भन्ने पुष्टी गरेको भन्दै उहाँले अन्तर्राष्ट्रीयस्तरको शिक्षा नेपालमै पाउनु ठुलो अवसर भएको बताउनु भयो ।

क्याम्ब्रिज इन्टरनेशनल एक्जामिनेशनका दक्षिण एसियाका क्षेत्रीय प्रबन्धक एन्ड्रिउ सोर्टवेलले ए लेभल शिक्षाप्रति नेपाली विद्यार्थीको चासो उत्साहप्रद रुपले बढेको बताउनु भयो ।

बुढानिलकण्ठ स्कुलका प्राचार्य नारायणप्रसाद शर्माले पहिलोपटक नेपालमा बुढानिलकण्ठ स्कुलले सन् १९८५ मा ए लेभलको सुरुवात गरेको स्मरण गराउँदै स्कुलबाट ए लेभल उतिर्ण विद्यार्थी विश्वव्यापी रुपमा सक्षम रहेको दाबी गर्नु भयो ।

विज्ञान, गणित, वाणिज्य शास्त्र, अर्थशास्त्र, लेखालगायतका विभिन्न विषयमा विभिन्न विद्यालयका विद्यार्थीले नेपालटप गरेका हुन् ।

हाल ए लेभल सहरी क्षेत्रमा एसएलसीमा उत्कृष्ट अङ्क हासिल गरेर उतिर्ण हुने अधिकांश विद्यार्थीको पहिलो रोजाइमा पर्ने गरेको छ । विद्यार्थीको यही आकर्षणलाई ध्यानमा राखेर तीन दर्जन कलेजले बेलायतस्थित क्याम्ब्रिज विश्वविद्यालय अन्तर्गतको यो पाठ्यक्रमको सम्बन्धन लिएर अध्यापन गराइरहेका छन् । यहाँका कलेजलाई यो पाठ्यक्रमको सम्बन्धन दिन अनुगमन गर्न तथा परिक्षा सञ्चालनका लागि क्याम्ब्रिज विविले नेपालस्थित ब्रिटिश काउन्सिललाई अधिकार प्रत्यायोजन गरेको छ ।

काठमाण्डौ, चैत्र १७ (नागरिक) - ब्रिटिश काउन्सिल र क्याम्ब्रिज विश्वविद्यालयले यस वर्ष ए लेभलमा उत्कृष्ट स्थान ल्याउने नेपाली विद्यर्थीलाई सम्मान गरेको छ ।

बिहीबार राजधानीमा आयोजित एक कार्यक्रममा उपराष्ट्रपति परमान्नद झाले उत्कृष्ट विद्यार्थीलाई लर्नर अवार्ड २०११ बाट सम्मान गरे । नेपाल टप र हाइएचिभमेन्ट प्राप्त गर्ने विद्यार्थीलाई सम्मान गरियो । यस वर्ष नेपालका तीन विद्यार्थीले सर्वोत्कृष्ट अंक ल्याएर 'वर्ल्ड टप' गरेका छन् ।

रातोबंगला स्कुलकी बेन्जना थापाले अंग्रेजी भाषा साहित्य, सितोस्ना नेपालले जेनरल पेपर र इंग्रोज श्रेष्ठले गणित विषयमा 'वर्ल्ड टप' गरेका छन् । कार्यक्रममा नेपाल टप गर्ने २६ विद्यार्थीलाई पनि सम्मान गरियो । ३० विद्यार्थी एक्सेप्सनल परफर्मेन्स इन क्याम्ब्रिज इक्जामिनेशन अवार्ड प्राप्त गरेको ब्रिटिश काउन्सिलले जनाएको छ ।

कार्यक्रममा बोल्दै उपराष्ट्रपति झाले विश्व शिक्षा प्रणालीसँग प्रतिस्पर्धी बनाउन नेपालको पाठ्यक्रममा ए लेभलका धेरै कुरा समेट्नु पर्ने बताए । उनले भने, 'नेपाली विद्यार्थीले वर्ल्ड टप गर्दा खुसी लागेको छ ।' क्याम्ब्रिज एजुकेटर्स इन नेपालका अध्यक्ष तथा चेल्सी इन्टरनेशनल एकेडेमीका संस्थापक प्रिन्सिपल सुधिर झाले नेपालमै ए लेभलको माध्यमबाट विश्वस्तरको शिक्षा प्रदान गरिएको बताए । ब्रिटिश काउन्सिलका कन्ट्री डाइरेक्टर रोबर्ट मोनरोले अवार्ड पाएका विद्यार्थीलाई शुभकामना दिए ।